အပူရှောင်စခန်းသို့ လာရောက်နားခိုကြသည့် သက်ကြီးရွယ်အိုဘိုးဘွားများအား တွေ့ရစဉ်
ဓာတ်ပုံ - ညီညီဇော်
အယ်လ်နီညို ကာကွယ်ရေး အပူရှောင်စခန်းက ဧပြီ ၁၀ ရက် ကမှ စတင်ဖွင့်လှစ်လိုက်တာပါ။ အပူရှောင်စခန်း ဖွင့်လှစ်ထားတဲ့ စနစ်သစ် ပုထိုးတိုက်ကျောင်းဝင်းက ကျယ်ဝန်းပါတယ်။ ကျောင်းထဲ မှာ မန်ကျည်းတို့၊ တမာတို့ စတဲ့ သစ်ပင်ကြီးတွေရှိတယ်။ ဒါ့အပြင် ကျောင်းဝင်းထဲမှာ မဏ္ဍပ်ပုံသဏ္ဌာန် အဆောက်အအုံကြီးတွေ ထိုးထား တယ်။ အမိုးကတော့ ထန်းလက် (ထန်းရွက်)ကို အသုံးပြုထား တယ်။ ထန်းရွက်က အပူဒဏ်ကို ကာကွယ်စေတာကြောင့် ထန်း ရွက်ထန်းလက်ပေါင်း လေးထောင်ကျော် ၀ယ်ယူကာ မိုးထားတယ်လို့ အပူရှောင်စခန်း ဦးဆောင်စီစဉ်သူ ဆရာတော် ဦးကောသလ္လက မိန့် ကြားပါတယ်။
ထန်းလက်အမိုးအောက်မှာ တော့ ခပ်ကျဲကျဲထိုးထားတဲ့ ၀ါးကွပ်ပျစ်တွေ တန်းစီနေတယ်။ ကွပ်ပျစ်တွေပေါ်မှာလည်း ၀ါး ကြမ်းဖျာတွေ ခင်းထားတယ်။ ၀ါး ကွပ်ပျစ်တွေအောက်နဲ့ မဏ္ဍပ်အတွင်းမှာတော့ သဲစိုစိုလေးတွေ ကွင်းလုံးပြည့် ခင်းထားတယ်။ မန်ကျည်းပင်စည် ပတ်ပတ်လည် မှာတော့ ငါ့သရောက်ဘက်က ထွက်တဲ့ ရေတွေ တစိမ့်စိမ့်ထွက် ကျနေတဲ့ သဲအိုးလေးတွေကို တန်းစီတည်ထားတယ်။ ဒါကြောင့် အပူရှောင်စခန်းအတွင်း ရာသီဥတုက စခန်းပြင်ပ ရာသီဥတုနဲ့ ဘာမှ မဆိုင်။ စခန်းတစ်ခုလုံး အေးစိမ့်လို့။
အပူရှောင်စခန်းစီစဉ်တဲ့ ဆရာတော် ဦးကောသလ္လက မိုးလေ၀သပညာရှင် ဆရာဦးထွန်းလွင်ရဲ့ ဒီနှစ်မှာ အယ်လ်နီညို ရာသီဥတုလာမယ်ဆိုတဲ့ ဟောပြောမှုတွေ နားထောင်ထားတယ်။
နောက်ပြီး ပြီးခဲ့တဲ့ ၂၀၁၀ နွေရာသီတုန်းက သူ့ဆရာဖြစ်သူ ဆရာတော်တစ်ပါး အပူလွန်ကဲတဲ့ဒဏ်ကြောင့် နှစ်လလောက် ကုလိုက်ရတာတွေ မျက်စိထဲ ပြေးမြင်တယ်။ ဒါကြောင့် သူ့မြို့က သက်ကြီးရွယ်အိုတွေကို ဘယ်လိုနည်းနဲ့ အပူဒဏ် ကာကွယ်အောင် ဆောင်ရွက်ပေးရမလဲ စဉ်းစားတယ်။ ဆရာတော်နဲ့ ပရဟိတလုပ်ငန်းတွေ တွဲလုပ်နေကျ ဆရာတော် သံဃာတော်တွေနဲ့ တိုင်ပင်ပြီး အပူရှောင် စခန်းလေး ဖွင့်ဖို့ စီစဉ်ကြတယ်။
ဆရာတော်တွေ လုပ်တော့ မြို့ခံတွေနဲ့ ပရဟိတအသင်းအဖွဲ့တွေ နောက်ကလိုက်ပါကြတယ်။ ငွေအား၊ လူအား ၀ိုင်းကြတယ်။ နောက်ပြီး ပခုက္ကူက အာဏာပိုင် အဖွဲ့အစည်းတွေလည်း ၀ိုင်းဝန်းကူညီကြတယ်။ မီးသတ်ဦးစီးဌာန ကဆို တစ်ရက်ခြားတစ်ခါ အပူရှောင် စခန်းလေးကို ရေလာဖျန်း ပေးပြီး မိုးတုရွာပေးတယ်။ ပရဟိတအဖွဲ့တွေက သက်ကြီး ဘိုးဘွားတွေကို အကြိုအပို့လုပ်ပေး ကြပါတယ်။
အပူရှောင်စခန်းလာတဲ့ သက်ကြီးရွယ်အိုတွေကို နေ့လယ်စာကျွေးပါတယ်။ နေ့လယ်ခင်းမှာလည်း သဘာဝ ဆီးဖျော်ရည်တိုက်ပါတယ်။ တရားခွေတွေဖွင့်ပေးပြီး ထိုင်နာချင်နာ လဲလျောင်းနာယူချင်ယူ ကြိုက်သလိုနေနိုင်ပါတယ်။ တစ်ရေးတစ်မော အိပ်လိုက အိပ်နိုင်ဖို့ ခေါင်းအုံး တစ်ယောက်တစ်လုံး ပေးထားပြီး သက်သက်သာသာ နေနိုင်တယ်လို့ ဆရာတော်ဦးကောသလ္လက မိန့်ပါတယ်။
နောက်ပြီး အပူရှောင်စခန်း လာတဲ့ သက်ကြီးရွယ်အိုတွေ မူး တာမော်တာ၊ တခြားကျန်းမာရေး လိုအပ်တာတွေ လုပ်ပေးခိုင်းဖို့ မြို့ နယ်ဆရာဝန်ကြီးက သူနာပြုနှစ် ယောက်နဲ့ လိုအပ်တဲ့ဆေးဝါးတွေ ချထားပေးတယ်။ ဒါကြောင့် အပူရှောင်စခန်းက ခေတ်စကားနဲ့ပြောရမယ်ဆိုရင် ရေမီးအစုံပါ။
ပခုက္ကူမြို့ အပူရှောင်စခန်း
ဓာတ်ပုံ - ညီညီဇော်
အပူရှောင်စခန်းလာကြတဲ့ သက်ကြီးရွယ်အိုတွေကလည်း ဒီ စခန်းလေးမှာနေရတာ အေးချမ်းတယ်လို့ ဆိုကြပါတယ်။ အိမ်မှာဆို သွပ်မိုးအပူ၊ ဖျာတွေကလည်းပူ။ အိမ်တွေ ပြွတ်သိပ်နေလို့ လေကမရ၊ ရတဲ့လေတွေ ကလည်း လေပူတွေဖြစ်နေတာကြောင့် နွေဆို အိမ်မှာနေရတာ ကြောက်နေကြသူ တွေပါ။ နောက်ပြီး ပူရတဲ့အထဲ ဘေးအိမ်က ဆောင်းဘောက်စ်နဲ့ တဒုန်းဒုန်း တဒိုင်းဒိုင်းနဲ့ ဖွင့်သံတွေကြောင့် နားပါပူကြပါတယ်။ ဒါကြောင့် နွေရောက်မှာ သေမလောက် ကြောက်ရတယ်လို့ အပူရှောင်စခန်းရောက် ဘိုးဘွားများက ဆိုပါတယ်။
အပူရှောင်စခန်း ရောက်လာတဲ့ အဘွားတစ်ဦးကတော့ အပူဒဏ်ကြောင့် သူတို့လို သက်ကြီးရွယ်အိုတွေ ဆုံးပါးကုန်ကြတာ ကြားရပြီး ကြောက်မိပေမယ့် ကံတရားအတိုင်းပဲလို့ တွေးထား လိုက်တယ်လို့ ဆိုပါတယ်။ ဒါပေမဲ့ အခုလို အပူရှောင်စခန်းလေး လုပ်ပေးတော့ သက်သာရာရတယ်လို့ ဆိုတယ်။
လူငယ်တွေအဖို့တော့ အပူ ဒဏ်ကို အသက်အရွယ်ကလည်း ငယ်သေးတာမို့ ခံနိုင်ကြပေမယ့် သက်ကြီးတွေအဖို့တော့ အတော်လေး ဒုက္ခတွေ့စေပါတယ်။ ချွေး တွေကပြန် ခေါင်းတွေက နောက် လူတစ်ကိုယ်လုံးပေါင်းထား
သလို နေရခက်တယ်လို့ အပူရှောင်စခန်း ရောက်လာတဲ့ အစိုးရ အငြိမ်းစားဝန်ထမ်း ဦးသန်းနိုင်ကဆိုပါတယ်။ ဒါကြောင့် အပူရှောင်စခန်းမှာ လာနေရတာ စိတ်ချမ်းသာလှတယ်လို့ ဦးသန်းနိုင်က ပြောပြ တယ်။
အမှတ် (၁၁)ရပ်ကွက်ကနေ လာတဲ့ အသက် (၆၅)နှစ်အရွယ် ဒေါ်တင်အေးကတော့ အိမ်မှာနေရင် ပူလွန်းလို့ ရေပဲသောက်တာ၊ အစားအသောက်တွေလည်းပျက်၊ ညဘက်တွေလည်း အိပ်မပျော်ဘူးလို့ ဆိုပါတယ်။ အပူရှောင် စခန်းမှာ အေးအေးချမ်းချမ်း နေရပြီး ညနေအိမ်ပြန်ရမှာတောင် ပူလွန်းလို့ လန့်တယ်လို့ ဆိုပါတယ်။
အခုချိန်ထိ အပူရှောင်စခန်းကို သက်ကြီးဘိုးဘွား ၆၀ ကျော်လာရောက်နေကြပြီး နောက်ထပ် လာချင်သူတွေလည်း ရှိနေတဲ့အတွက် အကြိုအပို့ကိစ္စ စီစဉ်နေရတယ်လို့ စီစဉ်သူတွေက ပြောပါတယ်။ ထန်းရွက်တွေလည်း ထပ် မှာထားပြီး ထပ်မံတိုးချဲ့ တည်ဆောက်သွားမယ်လို့ ဆရာတော် ဦးကောသလ္လက မိန့်ပါတယ်။ အပူရှောင်စခန်းကို လာမယ့် ၀ါဆို လောက်ကျမှ ဖျက်သိမ်းမှာဖြစ်ပြီး နှစ်တိုင်း ဆောင်ရွက်မယ်လို့ ဆိုပါတယ်။
မိုးလေ၀သပညာရှင် ဦးထွန်းလွင်ကတော့ လာမယ့် ရက်သတ္တပတ်အတွင်း မကွေးတိုင်းဒေသကြီးအတွင်းမှာ နေ့အပူချိန်တွေ မြင့်တက်ဦးမယ်လို့ ခန့်မှန်းထားပါတယ်။ ဒါကြောင့် အပူရှောင်စခန်းကို လာကြမယ့်သူတွေ ထပ်များ ဦးမယ့် သဘောပါ။ နောက်ပြီး သင်္ကြန်တရားစခန်းတွေလည်း ပြီးပြီမို့ တရားစခန်းကနေ အပူရှောင် စခန်းဆီ ကူးလာကြမယ့်လူတွေလည်း များတယ်လို့ စခန်းစီစဉ်သူများက ခန့်မှန်းကြပါတယ်။ အပူရှောင်စခန်း အတွက် လှူဒါန်းချင်သူတွေ အနေနဲ့ ဆရာတော်ဦးကောသလ္လ ဖုန်း ၀၉-၂၃၀၂၀၀၃ ကို ဆက်သွယ်နိုင်ပါတယ်လို့ ဆိုပါတယ်။
နေ့လယ် ၁၂ နာရီခန့်မှာတော့ သက်ကြီးဘိုးဘွားတွေကို အပူရှောင်စခန်းက ထမင်းကျွေးပါတယ်။ အပူဒဏ်သက်သာပြီး ရင်အေးစေတဲ့ မန်ကျည်းရွက်ချဉ်ရည် ဟင်းတစ်ခွက်လည်း အပါအ၀င်ပါ။
ထမင်းစားသောက်ပြီးတော့ အလှူရှင်မိသားစုတစ်စုက ဖျော်ရည်ဘူးတွေ လာလှူကြတာလည်း တွေ့ရတယ်။ တချို့ကတော့ ပုတီးလေးစိပ်ပြီး ထိုင်နေကြတယ်။ တချို့ကတော့ ဖွင့်ထားတဲ့တရား နာပြီး လဲလျောင်းနေကြတယ်။ မိုးမကျခင်ထိတော့ သက်ကြီးရွယ်အိုတွေ အပူရှောင်စခန်းလေးဆီ လာခိုကြရဦးမှာ အမှန်ပါ။
No comments:
Post a Comment